ആനക്കൊമ്പ്: മോഹന്‍ലാലിനെതിരായ ഹര്‍ജി തള്ളി
By smug - Monday, June 17, 2013
കൊച്ചി: ആനക്കൊമ്പ് കേസില്‍ നടന്‍ മോഹന്‍ലാലിനെതിരേ നല്‍കിയ ഹര്‍ജി ഹൈക്കോടതി തള്ളി. കേസിന്റെ അന്വേഷണപുരോഗതിക്ക് കോടതി ഇടപെടണമെന്ന ഹര്‍ജിയാണ് തള്ളിയത്. ഇതു സംബന്ധിച്ച വിജിലന്‍സ് അന്വേഷണ ആവശ്യവും നേരത്തെ വിജിലന്‍സ് കോടതി തള്ളിയിരുന്നു.
അനധികൃതമായി ആനക്കൊമ്പ് കൈവശംവെച്ച കേസില്‍ കേസെടുത്തെങ്കിലും അന്വേഷണം വഴിമുട്ടിയതായി കാണിച്ചാണ് ഹൈകോടതിയില്‍ ഹരജി നല്‍കിയിരിക്കുന്നത്. കേസില്‍ സിനിമാനടനും മുന്‍ വനം മന്ത്രിയുമായ കെ.ബി. ഗണേഷ്കുമാറും വനം ഉദ്യോഗസ്ഥരും ചേര്‍ന്ന് കേസ് അട്ടിമറിക്കുകയാണെന്നും ഹര്‍ജിയില്‍ ചൂണ്ടിക്കാണിച്ചിരുന്നു.
കേസ് അന്വേഷണത്തില്‍ ഹൈകോടതി ഇടപെടണമെന്ന് ആവശ്യപ്പെട്ട് തൃശൂര്‍ പൊറത്തുശേരി സ്വദേശി പ്രമോദ് ആണ് ഹൈകോടതിയെ സമീപിച്ചത്. നേരത്തെ ആദായ നികുതി വകുപ്പ് മോഹന്‍ലാലിന്റെ വീട്ടില്‍ റെയ്ഡ് നടത്തിയപ്പോള്‍ നാല് ആനക്കൊമ്പുകള്‍ കണ്ടത്തെിയിരുന്നു. ആനക്കൊമ്പ് കണ്ടെത്തിയ കാര്യം വനം വകുപ്പിനെ അറിയിക്കുകയും പിന്നീട് നടത്തിയ റെയ്ഡില്‍ അത് സ്ഥിരീകരിക്കുകയും ചെയ്തിരുന്നു.
എന്നാല്‍, അനധികൃതമായി സൂക്ഷിച്ച കൊമ്പുകള്‍ പിടിച്ചെടുക്കാന്‍ വനം വകുപ്പ് അധികൃതര്‍ തയാറായില്ലെന്നാണ് പരാതി. മോഹന്‍ലാലിനും മറ്റ് രണ്ടുപേര്‍ക്കുമെതിരെ വനം വകുപ്പ് നല്‍കിയ പരാതിയില്‍ പെരുമ്പാവൂര്‍ മജിസ്ട്രേറ്റ് കോടതിയില്‍ കേസ് നിലവിലുണ്ടെങ്കിലും തുടര്‍നടപടികള്‍ സ്തംഭിച്ചിരിക്കുകയാണെന്നും ഹരജിയില്‍ പറയുന്നുണ്ട്.
Follow our blog on Twitter, become a fan on Facebook. Stay updated via RSS
