ടെലിവിഷന്‍ പരസ്യങ്ങളില്‍ ധോണിയെ കോഹ്‌ലി മറികടന്നു

മുംബൈ: ഇന്ത്യയില്‍ ഏറ്റവും കൂടുതല്‍ വരുമാനം നേടുന്ന കായിക താരം ആരാണ് ? ഇന്ത്യന്‍ ക്രിക്കറ്റ് ക്യാപ്റ്റന്‍ എംഎസ് ധോണി എന്നതാണ് ഉത്തരം. ശരിയായിരിക്കാം എന്നാല്‍ ധോണിയെക്കാള്‍ 2013ലെ കഴിഞ്ഞ മാസങ്ങളില്‍ ടെലിവിഷന്‍ പരസ്യങ്ങളില്‍ നിറഞ്ഞ താരം ഇന്ത്യയുടെ പുതിയ വാഗ്ദാനമായ വിരാട് കോഹ്‌ലിയാണ്. ടെലിവിഷന്‍ റേറ്റിങ്ങ് എജന്‍സി ടാം (TAM) ആണ് ഈ കണക്കുകള്‍ പുറത്തുവിട്ടിരിക്കുന്നത്.

കഴിഞ്ഞ വര്‍ഷത്തെ അപേക്ഷിച്ച് 200 ശതമാനമാണ് വിരാട് കോഹ്‌ലിയുടെ പരസ്യ മൂല്യം വര്‍ധിച്ചിരിക്കുന്നത്. 13 പുതിയ ബ്രാന്റുകള്‍ കോഹ്‌ലിയെ മോഡലാക്കിയിട്ടുണ്ട്. കഴിഞ്ഞ വര്‍ഷം 3 കോടി രൂപയാണ് ഒരു ബ്രാന്റിന് ശരാശരി പ്രതിഫലം കോഹ്‌ലിക്ക് പ്രതിഫലം ലഭിച്ചിരുന്നെങ്കില്‍ ഈ വര്‍ഷം അത് 6 കോടിയായി വര്‍ധിച്ചിട്ടുണ്ട്. ലാപ് ടോപ്പ്, സൗന്ദര്യവര്‍ധക വസ്തുക്കള്‍, ചോക്ലേറ്റ് എന്നിങ്ങനെ വ്യത്യസ്ഥ പരസ്യങ്ങളിലാണ് കോഹ്‌ലി മോഡലായി എത്തിയിരിക്കുന്നത്.

ധോണിയെ ടെലിവിഷന്‍ കാഴ്ചയില്‍ മറികടന്നെങ്കിലും ബ്രാന്റ് വാല്യുവില്‍ ധോണി തന്നെയാണ് മുന്നില്‍ എന്നാണ് റിപ്പോര്‍ട്ട് ഒരു ബ്രാന്റിന് 8-10 കോടി വരെയാണ് ശരാശരി ധോണിക്ക് ലഭിക്കുന്ന പ്രതിഫലം. ഏതാണ്ട് നൂറുകോടി രൂപ ധോണിക്ക് പരസ്യ വരുമാനം ലഭിക്കുന്നുണ്ടെന്നാണ് കണക്ക്.