ഗണേഷ് കുമാര്‍ വഞ്ചിച്ച സ്ത്രീയാണ് സരിത: പി സി ജോര്‍ജ്

തിരുവനന്തപുരം: സരിതാ എസ് നായര്‍ക്ക് മുന്‍ മന്ത്രി കെ.ബി. ഗണേഷ്കുമാറുമായി ബന്ധമുണ്ടെന്ന് ചീഫ് വിപ്പ് ആരോപിച്ചു. ഗണേഷ് വിവാഹ വാഗ്ദാനം നല്‍കി വഞ്ചിച്ച സ്ത്രീയാണ് സരിത. അന്വേഷണം നടത്തിയാല്‍ പലരുടെയും പൊയ്‌മുഖം പുറത്താകും. ഗണേഷുമായി വിയോജിപ്പുള്ള കേരള കോണ്‍ഗ്രസ് ബിയിലെ ജനറല്‍ സെക്രട്ടറി മനോജ്കുമാറിനെ സ്വാധീനിക്കാനും ഈ സ്ത്രീ ശ്രമിച്ചിട്ടുണ്ടെന്നും പി സി ജോര്‍ജ് ആരോപിച്ചു.

ഗണേഷിനെ വീണ്ടും മന്ത്രിയാക്കാനാണ് അവര്‍ ഇറങ്ങിയിരിക്കുന്നത്. പ്രതിപക്ഷത്തോടും ഇങ്ങനെ ഒതു സ്ത്രീ ഇറങ്ങിയിട്ടുണ്ടെന്ന് നേരത്തെ പറഞ്ഞിട്ടുണ്ട്. ഫോണ്‍ കോള്‍ ലിസ്റ്റ്പുറത്തുവരുമ്പോള്‍ പല സത്യങ്ങളും പുറത്തുവരുമെന്നും ജോര്‍ജ് പറഞ്ഞു. സരിതയ്ക്ക് ജോപ്പനുമായി ബന്ധമുണ്ടെന്ന് മുഖ്യമന്ത്രി ഉമ്മന്‍ചാണ്ടിക്ക് നേരത്തെ മുന്നറിയിപ്പ് നല്‍കിയിരുന്നു. രണ്ടാഴ്ച മുമ്പ് വനം വകുപ്പുമായി ബന്ധപ്പെട്ട കമ്മിറ്റി യോഗശേഷം മുഖ്യമന്ത്രിയെ മാറ്റി നിര്‍ത്തിയാണ് അറിയിച്ചത്. സരിത നായര്‍ തന്നെയും വിളിച്ചിരുന്നെന്നും അത് തന്നെ കുടുക്കാനായിരുന്നെന്നും പിസി ജോര്‍ജ് പറഞ്ഞു.

ആര്‍ ബാലകൃഷ്ണപിള്ളയുടെ സെക്രട്ടറി മനോജിനെ സ്വാധീനിക്കാനും സരിത എസ് നായര്‍ ശ്രമിച്ചിരുന്നു എന്ന് പി സി ജോര്‍ജ് വെളിപ്പെടുത്തി. കേസില്‍ അന്വേഷണം നടക്കുമ്പോള്‍ ടെന്നി ജോപ്പനെ മുഖ്യമന്ത്രി മാറ്റിനിര്‍ത്തുമെന്നാണ് കരുതുന്നതെന്നും ജോര്‍ജ് പറഞ്ഞു.